الثلاثاء، 11 أغسطس، 2015

تجربتي مع إنجلش تاون "سالفة" English Town

السلام عليكم ..
اليوم راح احكي عن تجربتي مع معهد english town تجربة تقنية أكثر من إنها عن نظام التعليم فيه ، البداية قبل 7 شهور تقريباً ، سمعت مدح عن هالموقع انه موقع حلو لتعليم اللغة اون لاين و ابرز شي فيه الفصول الخاصة و الجماعية " الجماعية فاشلة جداً " لمدة نصف ساعة أو 40 دقيقة " ما يمديك تقول كلمتين الا مخلص الوقت او الاستاذ ساحب عليك بمجرد ما يقطع اتصالك او يصير عندك مشاكل فيه " المهم اول ما تدخل الموقع راح تلاقي عروض جاهزة " ادفع كذا و احصل على اشتراك لمدة كذا "انا سجلت فيها و بدأت الكورس وصلني بعدها اتصال من شخص اسمه هشام يعمل على ارشاد الطلبة لطرق التسجيل و العروض ، و قام ينفخ علي انه ليش تسجلين على طول دقي قبل علشان نحدد لك مشرف يحدد مستواك و على اساسه تدفعين ، 

المهم من دولار دفعت 2000 ريال ككورس لمدة 4 شهور تقريباً ، طبعا المشرف الدراسي هذا ما اعرف و سبق حاكيتهم اني احتاج اتواصل معه لان عندي استفسارات ، بعد انتهاء المدة " و للأسف كثير خدمات كانت متوفرة لي ولا ادري عنها و طارت " رجعت للموقع و لقيت عرض ب 79 دولار لمدة تسع شهور على ما اظن و سجلت فيه ، دق علي نفس الشخص و رجع على دوامة اول مرة سجلت فيها، و قالي إنه تسجيلك غلط لانك دفعت لمستوى عالي ! قلت له هالكلام مو موجود بالعرض اللي في الموقع يقولي مشكلتك ! قلت هذا خطأكم مافيه اي توضيح انه للمستويات العليا مو المتوسطة ، المهم قام يلف و يدور و الا يطلعني غلطانه بالأخير قال بنسوي لك خصم و زيدي على اللي دفعتيه 1500 و راح نضيف لك زيادة شهر على 3 شهور ، المهم سكت و قفلت بعدها بفترة دقيت و قلت انا ما عندي استعداد اكمل و رجعوا المبلغ اللي دفعته قال خلاص راح عليك انتي غلطانه اللي ما اتصلتي قبل و ضبطنا وضعك ! قلت الغلط غلط الموقع لأن العروض وهمية لمجرد جذب الطلبة و بالأخير اذا دفع الطالب تدقون تلومونه ليه ما دق و سأل !! غير ان العروض ما فيه اي توضيح " هذا اذا كانت عروض حقيقة"!! المهم قالي احنا فتحنا حسابك و تقدرين تستخدمينه قلت ما ابغى استخدمه بس المبلغ رجعوه ، ببساطة قفل السماعة و بس :) .
انا بصراحة ما راح احذر منه ولا اقولكم تمهلوا ولا تستجعلون خصوصا بالمواقع اللي تبهرك بعروضها و توضح لك ان الأمور سهله و حلوة و النتايج مضمونة ، لكن اللي يبغى يجرب حظه يجرب و هذا حظي و جربته ، بس بغيت اقول إذا بتستند على مواقع تقدم خدمات تعليمية اين كانت الخدمات ، لا تتأمل كثير فيها . 

هناك 4 تعليقات:

  1. بصراحة ما أدري بس ما استغربها منهم أنا سجلت شهر ب 1$ ما كان عندي فيزا ومن فيزت صاحبي جيت أبغى أكنسل ادفع التلقائي مافي بعد19 يوم يمكن ارسلت لهم رسالة يلغون الدفع التلقائي عشان الفيزا مو فيزتي تم حذف العضوية كاملة وباقي فيها 10 ايام تقريباً :(

    ردحذف
    الردود
    1. حياك
      ما ينفع الواحد الا اجتهاده الشخصي إذا كان كل واحد اشتغل شوي على نفسه و استفاد من الكم الهائل من المواد التعليمية المجانية على الانترنت و استفاد من نصايح اللي سبقوه كان كل الشعب يحكي انجلش .. استغلال كسلنا و ضعف التعليم عندنا صار مكسب للبعض للاسف !

      الله يعوض عليك و علينا

      حذف
  2. أزال المؤلف هذا التعليق.

    ردحذف
  3. يوجد على الانترنت كمية كبيرة جدا من المواد المجانية
    وهذا الموقع نقطة في بحر

    ردحذف

اتمنى أن ما كُتب أعلاه نال على استحسانك ، سعيدة بتواجدك :)